Fierdere ynrjochting Keningsdjip set yn ‘e hjerst 2026 útein
Provinsje Fryslân en Wetterskip Fryslân hawwe de plannen fêststeld foar de fierdere ynrjochting fan it gebiet rûnom de beek Alddjip. Ek binne de reaksjes út de omkriten besjoen en yn in reaksjenota beäntwurde. De wurksumheden fan de 5e útfieringsmodule begjinne nei’t ferwachte wurdt yn de hjerst fan 2026 en barre stap foar stap.
It projekt giet oer de ynrjochting fan de boppe- en middenrin fan it beekdelling Alddjip. De bestjoeren fan provinsje en wetterskip hawwe ynstimd mei:
- it ynrjochtingsprogramma
- de 5e útfieringsmodule Keningsdjip
- de nota mei reaksjes út de omkriten
- en it miljeu-effektrapport (MER).
Foar de 5e útfieringsmodule is goed 16,7 miljoen euro beskikber. Provinsje Fryslân betellet goed 10,1 miljoen euro en Wetterskip Fryslân draacht goed 6,6 miljoen euro by.
Omtinken foar soargen en winsken út de streek
Mei dizze plannen wurkje provinsje Fryslân en Wetterskip Fryslân oan doelen foar natuer en wetter. It giet om doelen foar it Natuurnetwerk Nederland (NNN), de Europeeske Kaderrichtlijn Water (KRW) en it Waterbeheer 21e eeuw (WB 21). Deputearre Matthijs de Vries fan Provinsje Fryslân: “Mei de oanlis fan 350 bunder nije natuer ynvestearje wy yn in sterker, griener en takomstbestindich Fryslân. It belang fan in sûn libbensfermidden, mear bioferskaat en romte foar natuer en rekreaasje stiet dêrby sintraal. De weardefolle reaksjes út de omkriten hawwe holpen om de plannen fierder te fersterkjen."
Yn de plannen is al rekken hâlden mei rekreaasje. Der komme in kuierpaad en trije plakken dêr't minsken de natuer yn de beekdelling belibje kinne. De provinsje Fryslân wol meiwurkje oan in bredere ferkenning fan gemeente Opsterlân oft der yn de takomst ekstra rekreaasjefoarsjennings heger op de flanken fan de beekdelling mooglik binne.
De gebietskommisje freget omtinken foar ûnferwachte effekten fan de maatregels yn de wetterhúshâlding en fan de peilferheging. “Wy begripe dat dizze maatregels spannend binne foar de lânbou”, seit deistich bestjoerslid Gerben de Boer fan Wetterskip Fryslân. “Fan de kant fan it gebietsproses bliuwe wy dêrom yn petear mei grûneigeners en -brûkers. Wy fiere de maatregels stap foar stap út en folgje de effekten goed. Der is jild beskikber om by te stjoeren en foar langere tiid neisoarch te bieden as dat nedich is."
Mei-inoar wurkje oan plannen
Foar de plannen binne in soad ûndersiken dien. Dy foarmje de basis fan it projekt. De plannen binne makke yn gearwurking mei LTO, Steatsboskbehear, Natuermonuminten, It Fryske Gea, Wetterskip Fryslân en gemeente Opsterlân. Ek belanghawwenden en (grûn)eigeners binne belutsen. Mei harren binne meardere keukentafelpetearen fierd.
28 reaksjes yntsjinne
De plannen leine earder op besjen. Yn dy perioade binne der twa ynformaasjegearkomsten en in fjildekskurzje organisearre. Yn totaal binne der 28 reaksjes yntsjinne. Ek de gebietskommisje Keningsdjip en de Kommisje m.e.r. joegen advys. Yn de reaksjenota stiet hoe't dy advizen en sjenswizen yn de plannen ferwurke binne.
Mear witte?
Wolle jo mear witte oer de gebietsûntwikkeling Keningsdjip en wat de plannen binne foar it Alddjip yn de kommende jierren? Sjoch dan op: Gebietsûntwikkeling Keningsdjip | Fryslan. Dêr fine jo ek de fêststelde plannen en de reaksjenota.