Wa is ferantwurdlik foar it ûnderhâld oan de wâlskanten lâns de farwegen yn Fryslân? Op dy fraach jouwe de Fryske gemeenten, Wetterskip Fryslân en provinsje Fryslân antwurd fia in digitale kaart. Sa ûntstiet dúdlikens hokker wâlskanten de Fryske oerheden beheare, mar ek hokker wâlskanten ûnder it behear falle fan partikulieren of oare ynstânsjes. 

Wêrom? 

Yn ús provinsje leit mear as 1700 kilometer oan wâlskanten lâns farwegen. Wa't ferantwurdlik is foar it behear fan dizze wâlskanten, wie net altyd like helder. Ien wâl kin nammentlik meardere belangen tagelyk tsjinje, sawol fan de Fryske oerheden as fan partikulieren (of oare belanghawwenden). Om dizze ûndúdlikheid fuort te nimmen, hawwe Fryske oerheden tegearre ôfspraken makke. Dy ôfspraken liede ta in dúdlike tadieling fan it behear fan de oerheid. It is de bedoeling dat dy ôfspraken fan krêft wurde fan 1 maaie 2024 ôf.

Hoe sjogge dizze ôfspraken der út? 

Neffens dizze nije tadieling is de provinsje ferantwurdlik foar de wâlskanten lâns beropsfarwegen. De wâlen dy 't fan belang binne foar de wetterkwaliteit of dêr 't grutte streaming is, komme yn behear by it wetterskip. En leit in iepenbiere wâl yn de beboude kom, dan is de gemeente oan set. Sa binne der noch mear kritearia (sjoch de beslisbeam), wêrmei't goed 1300 kilometer oan wâl tadield is oan in oerheid. Dan bliuwt der noch sa'n 400 kilometer oan wâlskanten oer, wêrfan't it behear in ferantwurdlikheid is fan partikulieren of oare ynstânsjes. Hoe't dy tadieling der yn 'e praktyk út sjocht, is yn ûndersteande kaart werjûn.

Klik hjir om de gruttere kaart te iepenen(eksterne keppeling)

Subsydzje oanfreegje 

Under bepaalde betingsten betellet de oerheid mei oan it behear en ûnderhâld fan wâlskanten. Dit dogge wy fia in subsydzjefûns. Op boppesteande kaart is ek in earste yndikaasje jûn hokker wâlskanten mooglik foar subsydzje yn oanmerking komme. Klik hjirfoar op ‘leech iepenje’ en dan ‘finansjele bydrage’. Oan de hân fan dizze kaart kinne jo sels alfêst in ynskatting meitsje oft jo oanspraak meitsje kinne op dizze subsydzje. In subsydzje oanfreegje kin fan 1 maaie 2024 ôf.

Foarskiednis 

Oan dy tadieling is it nedige oan oerlis en beslútfoarming foarôf gien. De meast wichtige dokuminten fine jo hjirûnder werjûn.

Dokuminten

Hawwe jo problemen mei de lêsberens? Dan kinne jo in formulier ynfolje of belje mei it Klantkontaktsintrum. Sy helpe jo graach fierder.